تحضير طاجين الزيتون باللحم المفروم من مطبخ صفاء. وصفة بزاف بنينة و سهلة. تحضر في وقت وجيز و بمكونات بسيطة لكن جد غنية بالبروتينات و الفيتامينات لأنه تحتوي في الأساس على اللحم يكون مفروم مع الزيتون بدون عضام.
تتماشى الوصفة مع كل الفصول في تدوينة عبر مدونة صفاء للطبخ.
طاجين الزيتون بكريات اللحم المفروم
المكونات:
- زيتون منزوع البذور
- حبة بصل كبيرة مسكرفجة
- حبة طماطم صغيرة مسكرفة
- زوج فصوص ثوم مسكرفجين
- لحم مفروم (فيونداشي)
- ملح
- معدنوس و قصبر
- زيت
- وريقات رند
- توابل( راس الحانوت, فلفل اسود, زنجبيل مطحون, كركم)
طريقة التحضير:
الخطوة الأولى:
في اناء نحطو الزيتون تاعنا يتغلى ونروحو نقليو المرقة نحطو فالطنيجرة تاعنا حبة بصل مسكرفة و زوج فصوص ثوم مسكرفجين ايضا و ملح و زيت و فلفل اسود و راس الحانوت و زنجبيل مطحون نقليو هاذ المكونات مع بعض من بعد نضيفو المعدنوس و نبقاو نقلو فيهم على نار هادية من بعد نضيفو حبة طماطم مسكرفجة هنا الطوماطيش تقدرو تستغناو عليها بالنسبة ليا انا نحب ندير في لاصوص تع طاجين الزيتون حبة طماطم صغيرة مسكرفجة كاين لي يحب يدير و كاين لي ميديرش يعني راجعة للذوق دايما نقولهالكم هاذ الاضافات مجرد اذواش مش تطلب نتقيدو بيها و الطبخ هو فن يعني كل واحد وواش يفضل وواش يحب يزيد ولا يبدع فيي طيابو بعدما نضيف الطماطم نخلوها تتقلا شوية نروح نصفي الزيتون تاعي و نخليه يقطر من بعد نحطو حتى هو يتقلى مع المكونات لي درناهم انا الزيتون نقليه عادي مع المكونات قبل منمرق يعني منضيفوش حتى تبدا المرقة تغلي لالا نضيفو قبل منمرق بعدما يتقلاو قاع المكونات مع بعض مليح نروح نمرق بماء سخون
الخطوة الثانية:
نحضرو فيها كريات اللحم المفروم و لي رايحين نتبلوهم بنفس التوابل لي حطيناهم في مرق طاجين الزيتون و الي هوما راس الحانوت فلفل اسود و زنجبيل مطحون ونضيفو شوية ملح بالنسبة لطاجين الزيتون ميطلبش الملح بزاف لانو الزيتون المرقد معروف انو يجي فيه ملح زيادة على هاذي لازم منكثروش الملح باش يجينا الملح فالعبر من بعد نزيدو للحم المفروم قصبر مقطع و نخلطو الكل مع بعض جيدا و نشكلو اللحم المفلاوم تاعنا على شكل كريات و نحطوهم بجيه كي نشوفو المرقة تاعنا بدات تغلي و نقصت شوية و بدات تخثار نضيفو الكريات تاع اللحم المفروم و نخروهم يطيبو حتى نشوفو المرق تاعنا خثر نطفو عليه و نحطو معدنوص مقطع باش يزيدنا نكهة شابة و نحطوه في طبق التقديم و رايح يكون طبق غني و بنين بزاف نتمنى تجربو طريقتي في تحضير طاجين الزيتون و ان شاء الله تنال اعجابكم
للمزيد من الوصفات من مدونة صفاء للطبخ اضغط هنا